Samalam tu unda kada manyangka jua. Rancana ka kandangan handak maantar haja, eeeiiihhh…. sakalinya ka wadah ading batugas. Napa da lagi mau kada mau ai, imbah sampai wadah ading nang di andak urang di Lumpangi, parak banar luku wan tempat wisata air panas, Balajur di bawai nya ai bajuuk ka Tanuhi pulang, kaya pa pang lagi.
Handak pang basinggah ka wadah pak syam wan wahyu katia malam banar ari. Lawan pulang lain rombongan blogger ha pulang, lalu asa ngalih ai.
Wayah wan bubuhan blogger samalam makalaham, unda mandi banar di kolam banyu panas, samapai mandua tiga kali banyalam, asa puas banar pang sudah, napa ampih sakit kupalaku, tapi batambah pang wan ubat mixagrip nang di tukarakan ulih pak syam, terimakasih banar pak syam lah.
Nah pas libur tahun baru ta ka Tanuhi pulang, di bawai ading tieh, handak pang mandi pulang, tapi kadada sangu salawar handap, jaka tida, pacangan banyalam pulang kaya sumalam.
Akhirnya kada jadi mandi, tapi unda ada ja pulang nang di ulah disitu, handak tahulah buhan ikam, unda minum banyu panas nitu sampai mandua talu kali, sampai puas! Kada minum di kolam nang di caburi urang tu pang! Ni nang di atasnya[ sumbernya wal ai], asli dasar nyaman banar tu pang, ibarat gumbili dirandam kasitu pasti masak.cuba akan ja.
Artinya unda ta kasitu, kada talalu sia-sia pang.
Imbah bulikan, handak pang basinggah ka simpang tiga Bilui, tapi rombongan maminta ka Amawang Kiri ja, tanyaman sadikit kada tapian jauh tuh, ayu ai mun kaya nitu.
Kisah lawas masing-masing takaluar papadaan barucau, sampai akhirnya bapadah bulikan, kaina ka malaman banar buliknya, mana trak batu bara banyak kaina, pacang ngalih di jalan.
Wayah bulik, harau jalanan kada tapian rami motor, trak-trak batu bara kadada, buhannya libur ba angkut malam ni, masih tahun baru pang, lalu asa nyaman ai balinggang, Cuma nang mambari muar adalah lubak di jalan taranjah tarus, maka dalam-dalam ha pulang, aduuh… kayapa ni, tulungai pamarintah mahatiakan jua wan jalan kita supaya nyaman jua nih warga, kasian nang ba kandaraan banar ai…kalu tajungkang!
Sampai pang di rumah nah, salamat ha pulang, han syukur banar! Cuma uyuh pulang awak, asa kiepa kah jar urang tu kada sakira.
Babaya tagatuk bantal, hilang am sudah kada tahu kisah lagi.
Jadi ka Tanuhi dua kali, maka akhir tahun 2008 wan awal tahun 2009, ini nang ngalih cariannya. Hehehe…
Siang rahatan baudak printer[di babarabak habis] ada sms nang batulis kaya niti:
“msh dkndngnkah.bila kbb?”.
Unda ingat-ingat numur sapa ngini? Maka xl pulang, rasanya asa kadada nah numur ngini, lalu ku balas ai jua
“ sdh bgw nah dbjb” lalu di balasnya jua
“ kl pang blws kaina adaai mhbngi” imbah itu kada lagi balasannya.
Pas bulik bagawi ada pulang ma sms, numur nitu pulang
“ mlm ini kw klo krmh bb 2 jln tmlwk 50” maginannya ai unda bingung, numur sapa gerang ni.unda talipun nai pulang, harau di matii nya, kada panasaran lah! Udahai kubiarakan ai, sambil ma sms jua “ aux kad tahu imak, ni nomor sapa garang?
Ieh sakalinya manalipun urangnya, unda angkat ai
“ halo, sapa nih” jar auk
“ aku, kakanya si anu”
“oh yak ah, kada ingat nah, habis numur pian kadada dah ulun”
“ cuk banar, mada-i kada tahu”
“ ya am nah kada tasimpan”
“ anu, malam ni kawa lah karumah satumat, internetku kada mau”
“ yak ah, kaina lun datangi, tapi habis isya pang”
“ yak ah, kada sasat lu manuju”
“ cuba-i yai dahulu, mun pina sasat keina lun talipun pulang”
“ ayu ai mun kaya itu, ku hadangi lah”
“ ya, dangi ja”
Lalu unda tulak ai kasana, tasasat jua pang sadikit, balalu manalipun ai, sakalinya harau dihiga rumah sudah.tapakalah pang auk jadinya.
Di rumahnya unda kutak katik wan laptopnya, mbahanu mau mbahanu kada, muyak jua sudah, kasimpulannya harau kabel datanya nang pina error, kaina ai pulang maudaknya. Lalu unda bulik karumah. Mauk dah kira-kira.
Sampai dirumah balalu marabau ai batimbai ka paguringan, langlam salajur.
